Evropa duhet të forcojë aftësitë e saj mbrojtëse dhe të kalojë në një ekonomie lufte përballë kërcënimit që paraqet Rusia, deklaron presidenti i Këshillit Evropian, Charles Michel, në një artikull të botuar në gazetat evropiane dhe në faqen e internetit Euractiv.
Charles Michel, i cili do të kryesojë një samit të liderëve të Bashkimit Evropian të enjten për mbështetjen për Ukrainën, shkruan se Evropa duhet të marrë përgjegjësinë për sigurinë e saj dhe të mos varet aq shumë nga mbështetja e vendeve si Shtetet e Bashkuara.
“Nëse nuk japim përgjigjen e duhur si Bashkimi Evropian dhe nuk i japim Ukrainës ndihmën e mjaftueshme për të ndalur Rusinë, ne jemi të radhës. Për rrjedhojë, ne duhet të jemi gati në mbrojtje dhe të kalojmë në një modalitet të ekonomisë së luftës…Nëse ne duam paqe, duhet të përgatitemi për luftë”, shkruan ai.
Sipas Charles Michel, megjithëse Evropa ka bërë përparime që nga pushtimi rus i Ukrainës në shkurt 2022 – mes tyre rritja e kapacitetit të prodhimit ushtarak me 50% – duhet bërë shumë më tepër, pasi për dekada, Evropa nuk ka investuar shumë në sigurinë e saj dhe mbrojtjen.
Presidenti i Këshillit Evropian u bën thirrje vendeve të BE-së që të sigurojnë që Ukraina të marrë atë që i nevojitet për fushën e betejës – si duke shpenzuar fondet e BE-së për pajisje ushtarake dhe duke përdorur kthimet në asetet e sekuestruara të Rusisë për blerjen e armëve për Ukrainën. /vizionplus.tv
