Ish-deputeti demokrat Ervin Salianji, pasditen e sotme ka zhvilluar një takim me qytetarët në Peshkopi, ku ka folur për situatën brenda PD dhe zhvillimet politike në vend.
Ai u shpreh se, pavarësisht përjashtimit të tij nga gara për kreun e Partisë Demokratike, do të vijojë takimet me demokratët në të gjithë vendin.
“Kjo në fakt është përgjigjja më e mirë që mund t’i jepet kujtdo nëpër studio e media që pyet nuk ka garë, gara është nëpër sheshe! PD nuk uzurpohet, nuk ecet dot mbrapsht!”, tha Salianji në nisje të fjalimit.
Ai theksoi gjithashtu se Partia Demokratike duhet të ndryshojë dhe të rikthehet në vlerat e saj themeluese.
“Pavarësisht humbjeve, dështimeve, standardit mizerabël sesi është administruar në 13 vite PD, është e vetmja parti që mund të bëjë ndryshimin. Por për ta bërë këtë, ajo duhet të ndryshojë dhe të rikthehet në vlerat themeluese”, u shpreh ai.
Salianji kritikoi mënyrën e funksionimit të partisë, duke thënë se figurat duhet të zgjidhen nga demokratët dhe jo nga një lidership i mbyllur.
“Figura janë ata që zgjedhin demokratët, jo një lidership që për interesa personale ka uzurpuar PD. Nuk mund të jetë Shqipëria dhe PD një frëngji ku gjuhen ambasadorët… por duke bashkëpunuar dhe ndërtuar partneritet. Vetëm me këtë kapërcim, PD mund të hapet dhe të fitojë”, tha ai.
Më tej, ai bëri përgjegjës Sali Berishën për situatën e opozitës.
“Sali Berisha nuk mund ta sjellë Partinë Demokratike në pushtet as sot, as nesër dhe as kurrë! Çdo ditë që ai qëndron në krye të PD është fitore personale për të, por humbje e madhe për PD-në, opozitën dhe Shqipërinë. Ai sot është i izoluar ndërkombëtarisht dhe qëndrimi i tij në krye të PD ndihmon duke mbajtur në pushtet Edi Ramën. Sali Berisha është barrë për opozitën dhe duhet t’i hapë krahun një brezi tjetër”, u shpreh Salianji.
