Dy muaj pas vdekjes së 25-vjeçares Xhuana Nikollaj, familjarë, të afërm dhe qytetarë të Lezhës janë mbledhur mesditën e sotme pranë Obeliskut në qytet, për të ndezur qirinj në kujtim të saj dhe për të kërkuar drejtësi.
Mes dhimbjes dhe lotëve, familjarët shprehen se prej dy muajsh jetojnë me plagën e humbjes së Xhuanës, por edhe me ankthin dhe zhgënjimin për moszbardhjen e plotë të kësaj ngjarjeje të rëndë. Ata kërkojnë që drejtësia të vihet në vend dhe e vërteta të dalë sa më shpejt në dritë.
“Ne jemi mbledhur sot këtu me një dhimbje shumë të madhe. Kanë kaluar dy muaj, por akoma nuk është vendosur drejtësi. Kemi një lutje për të gjitha institucionet, të kapet autori.”
“Ne kemi besim dhe shpresojmë që drejtësia të vendoset në vend sa më shpejt. institucionet të bëjnë punën, mos ta zvarrisin dhe çdo veprim të bëhet me transparencë. Pse nuk është kapur akoma autori? Kemi dalë këtu sepse duam drejtësi”.
Të pranishmit mbajtën një minutë heshtje në nder të 25-vjeçares, ndërsa ndezën qirinj dhe vendosën lule pranë fotos së saj.
Kujtojmë se Xhuana Nikollaj humbi jetën pas dhunës së ushtruar ndaj saj, nga ish-bashkeshorti Eraldo Fizi ndërsa më pas dyshohet se ka konsumuar fostoksinë.
Ngjarja ka tronditur opinionin publik dhe vijon të mbetet ende e mbushur me pikëpyetje për familjarët e saj, të cilët kërkojnë zbardhjen e plotë të rastit.
