Pas publikimit të draftit të ligjit për presidentin, nuk ka vonuar edhe reagimi i kreut të shtetit. Ilir Meta e ka cilësuar nismën e mazhorancës si një përpjekje puçiste kundër institucionit që ai drejton.
ILIR META – PRESIDENT I SHQIPERISE
Kam 0 interes për çdo draft edhe përpjekje puçiste. Ju e dini që ky është një parlament jokushtetues. Është një parlament ku unë kudo ku dal e takoj qytetarë më kërkojnë shpërndarjen e tij të menjëhershme. Është një parlament puçistësh por për fat të keq një pjesë e mirë e tyre janë dhe tradhtar dhe mercenarë.
Meta ka përsëritur se në 25 prill populli shqiptar do t’i jap përgjigjen e merituar qeverisë.
Për mua ka vetëm një interes 25 prilli. Është populli i Shqipërisë. Unë kam nisur marshimin tim si president drejt referendumit të 25 prillit. Dhe do të jetë një referendum i qartë pasi mbi 95% e shqiptarëve do të votojnë për Shqipërinë në Europë, edhe ju e dini shumë mirë që kjo është një çështje që është zhvendosur më.
Presidenti është pyetur edhe për aktakuzat e ngritura ndaj liderëve te Kosovës nga Gjykata Speciale, të cilat i ka konsideruar si një investim të Serbisë.
Krijimi i gjykatës speciale ishte një investim i Serbisë, i aleatëve të saj, është dhe një çmim që paguhet për pavarësinë e Kosovës. Absolutisht kjo është një përpjekje e dështuar për të vënë në diskutim luftën heroike të shqiptarëve të Kosovës. Apo për të future në krizë funksionimin e shtetit të Kosovës.
Tirana ka reaguar njëzëri në mbrojtje të Hashim Thaçit, Kadri Veselit, Rexhep Selimit e Jakup Krasniqit, duke shprehur bindjen se lufta e Ushtrisë Çlirimtare te Kosovës nuk do të njolloset.
