Policia Kufitare ka bllokuar një mjet lundrues në zonën e Borshit dhe ka ndëshkuar drejtuesin e tij me një gjobë prej 500 mijë lekësh të rinj, pasi kishte shkelur perimetrin e sigurisë duke rrezikuar jetën e pushuesve.
Ngjarja është konstatuar gjatë kontrolleve dhe patrullimeve të intensifikuara përgjatë vijës bregdetare, të ndërmarra për garantimin e sigurisë së pushuesve dhe respektimin e rregullave të lundrimit.
Sipas Policisë Kufitare, gjatë patrullimit në zonën e quajtur “Krorëz”, u evidentua një mjet lundrues që kishte hyrë brenda perimetrit të sigurisë, në hapësirën ku po laheshin pushuesit.
Pas verifikimeve dhe veprimeve administrative, autoritetet vendosën masën administrative prej 500 mijë lekësh të rinj ndaj drejtuesit të mjetit, si dhe bllokimin e mjetit lundrues.
Policia e Shtetit u ka bërë thirrje përdoruesve të mjeteve lundruese që të respektojnë perimetrat e sigurisë dhe të mos afrohen në zonat e përcaktuara për pushuesit, me qëllim shmangien e rreziqeve për jetën dhe sigurinë e qytetarëve.
/vizionplus.tv
