Seanca plenare e radhës në Kuvendin e Shqipërisë është shoqëruar me tensione dhe përplasje mes deputetëve të opozitës dhe mazhorancës.
Deputeti i “Lëvizja Bashkë”, Redi Muçi, në fjalën e tij në nisje të seancës, kërkoi dorëheqjen e kryeministrit dhe mbajtjen e zgjedhjeve të parakohshme. Ai u shpreh se protestat e qytetarëve po vijojnë prej 33 ditësh, duke theksuar se sipas tij qeveria ka humbur legjitimitetin për të qeverisur.
Muçi solli si shembull edhe situatën politike në Mbretërinë e Bashkuar, duke deklaruar se ndërrimi i shpeshtë i kryeministrave atje tregon përgjegjshmëri politike kur nuk përmbushen pritshmëritë e qytetarëve.
“Shpresoni se duke i marrë një më një me biografi do të trembni protestuesit. Por ata protestojnë dhe po vijojnë për 33 ditë. Ata kanë kuptuar se nuk keni më legjitimet për t’u qeverisur. Në 10 vitet e fundit, në Britaninë e Madhe janë ndërruar gjashtë kryeministra, sepse deputetët e partisë së tyre e kuptuan se këta kryeministra nuk i kanë përmbushur pritshmëritë. Këtë duhet ta bëni dhe ju po të kishit ndërgjegje. Shpallni zgjedhjet e parakohshme, nëse mendoni se fitoni 100 mandate. Nëse keni dinjitet jepni dorëheqje”, tha ai.
Pas deklaratave të tij, deputeti i Partisë Socialiste, Ardit Bido, iu përgjigj duke e akuzuar Muçin për mungesë përvoje pune dhe duke mbrojtur orarin dhe angazhimin e deputetëve të mazhorancës në Kuvend.
“Kemi një parti të establishmentit më të rëndë. Vjen e na thotë që do të turpërohej pse vijmë më herët në punë. Jemi mësuar të vijmë në punë, të punojmë, të nxjerrim lekët me djersën e ballit, të mos shkojmë në zona të mbrojtura. Të mos themi që kemi bërë shkollën te Koto Hoxhi dhe dilnim nga shtëpia që mami i dha leje babit për ta bërë në oborrin e shkollës. Kështu jemi mësuar, jemi mësuar të punojmë. Ti s’ke punuar ndonjëherë, prandaj ta mirëkuptoj habinë tënde. Ti nuk je agjent, nuk e di, s’e vendos dorën në zjarr. Para një jave këtu ishte seancë për Çamërinë, ti s’erdhe, kisha aktivitet në Qafë-Botë, të kam ftuar, ti nuk erdhe. Unë me minoritarët nuk kam asnjë problem se janë pjesë e shëndetshme e kësaj shoqërie, janë shqiptarë patriotë e grekë të pashuar. Kam problem vorio-epirotizmin tënd dhe po të ishe ndryshe do të të hiqja kapelen, por ti nuk flet për Çamërinë. Ti je tradhtar!”, tha Bido.
