Tensione dhe përplasje të forta u regjistruan ditën e sotme jashtë ambienteve të Kuvendit, mes protestuesve dhe punonjësve të Policisë së Shtetit.
Sipas informacioneve zyrtare, si pasojë e incidentit kanë mbetur të lënduar tre efektivë policie dhe katër protestues. Të plagosurit janë transportuar për trajtim mjekësor në dy struktura spitalore.
Në Spitalin Universitar të Traumës po marrin ndihmë mjekësore dy efektivë policie dhe dy protestues, ndërsa në QSUT po trajtohen një efektiv policie dhe dy protestues të tjerë. Burime spitalore bëjnë me dije se të gjithë të lënduarit janë jashtë rrezikut për jetën dhe po i nënshtrohen ekzaminimeve sipas protokollit, duke u mbajtur nën monitorim të vazhdueshëm.
Në lidhje me ngjarjen ka reaguar edhe Ministri i Brendshëm Besfort Lamallari, i cili nga spitali i Traumës dënoi ashpër sulmet ndaj policisë, duke i cilësuar ato si akte vandale dhe kriminale. Ai u shpreh se efektivët e Policisë së Shtetit janë në shërbim të ligjit dhe rendit publik, dhe sipas tij, sulmi ndaj tyre përbën sulm ndaj shtetit dhe rendit kushtetues.
Ministri theksoi gjithashtu se askush nuk mund të abuzojë me të drejtën e tubimit paqësor duke e shndërruar atë në dhunë. Ai shprehu mbështetje për policinë dhe u uroi shërim të shpejtë të lënduarve, si efektivëve ashtu edhe protestuesve.
