Një tjetër operacion i komisariatit nr.4 në Tiranë çoi në goditjen e të paktën dy grupeve kriminale që prej kohësh merreshin me trafikun e armëve të zjarrit.
Në pranga kanë përfunduar 4 persona, Marsel Varka, Elsaed Maqinaj, Fabian Zako dhe Kristaq Biba. Ndërsa në kërkim janë shpallur Kevin Vila dhe Bledar Avdillari.
Burime bëjnë me dije se këta 6 persona ishin të përfshirë në të paktën 2 grupe kriminale që shisnin armë zjarri dhe municione luftarake në disa zona të ndryshme të Tiranës si në Unazë të Re, Selitë, Fresk etj.
Hetimi ndaj tyre ka nisur përpara disa kohësh kur në prangat e policisë për të njëjtin aktivitet kriminal u kapën 5 persona. Në bazë të zbërthimeve të telefonave të tyre, policia gjeti disa prova që tregonin përfshirjen e anëtarëve të tjerë të grupeve të trafikut të armëve të zjarrit.
Jo vetëm kaq, por përfshirja e 6 personave në shitjen e armëve, është faktuar nga blutë edhe përmes blerjeve të stimuluara.
Gjatë operacionit të fundit, 4 të arrestuarve dhe 2 personave të shpallur në kërkim u janë sekuestruar 7 armë zjarri, konkretisht 4 pistoleta dhe 3 automatikë, municion luftarak etj. Pistoletat do të shiteshin në treg deri në 1500 euro copa, ndërsa automatikët në vlerën 2500 euro.
Ndërsa Komisariati nr 4 në goditjen e këtyre grupeve kriminale në total që në nisje të hetimeve ka arrestuar 9 persona, 17 armë zjarri të sekuestruara, 4 kallëpe lëndë plasëse, sasi e madhe municioni, 4 automjete dhe 13 celularë.
Ndërkohë policia vijon hetimet për zbulimin e personave të tjerë të përfshirë në grupet kriminale të shitjes të armëve të zjarrit.
