Ish-gjyqtari Alaudin Malaj, i ftuar këtë të martë në “Quo Vadis” të moderatores Pranvera Borakaj në Vizion Plus, ka folur për protestën që po zhvillohet në Tiranë.
Ai tha se protesta në Shqipëri është një gjë mjaft pozitive, pasi kështu vjen ndryshimi. Sipas Malajt, protesta e sotme është e ngjashme me atë të studentëve në vitet ’90.
Malaj bëri thirrje që nga kjo protestë duhet të dalë një forcë politike, pasi nëse vijon pa organizatorë, atëherë protesta nuk do të ketë sukses real.
Pjesë nga biseda:
Borakaj: Dita e 10-të e protestës, si e keni parë ju?
Malaj: Në lidhje me protestën, mendoj se është gjëja më e mirë që mund t’i ndodhë një kombi. Unë kam qenë student i Dhjetorit dhe e di shumë mirë që e ardhmja e këtij vendi ka ardhur nga protesta. Utopia jonë për të ardhmen e Shqipërisë ishte e ndryshme nga ajo që kishim menduar deri në atë kohë. Ishim vetëm 20-vjeç në atë kohë dhe thyem një regjim shumë të egër. Unë jam nga ata që them se Shqipëria do zhvillohet vetëm nga protestat. Ai brez i ri aty është një nivel intelektualësh.
Mendoj që kjo protestë nuk është vetëm për Zvërnecin, e cila është vetëm një pikë ujë. Një nga kryesoret është e drejta që kanë këta njerëz për t’u kthyer në Shqipëri. Demonstratat, për mua, po ta vësh re, janë të ngjashme në të gjitha shtetet evropiane me ato që po bëjnë shqiptarët. Këta njerëz që kanë ikur atje tregojnë se e duan atdheun e tyre, kanë ikur të detyruar atje. Dëshira për t’u kthyer në Shqipëri, për ta parë vendin sa më të zhvilluar, është ajo që i mbledh të gjithë këta.
Borakaj: Hiqni paralele mes dy protestave?
Malaj: Unë mendoj se është e njëjta frymë. Kemi të njëjtën politikë si ajo para ’90-ës. 40 zgjati e vjetra, 30 kjo tani. Kjo politikë është më e moderuar, pasi ky brez është më i shkolluar, por mendoj se jemi në të njëjtën frymë të protestës. Suksesi atëherë ishte se u morën përsipër nga intelektualët. Nëse kjo protestë do të vazhdojë siç është, do të ketë prosperitet të dukshëm, por pa sukses real. Për mua duhet të krijojnë parti politike.
