Ish-gjyqtari i Gjykatës së Apelit, Alaudin Malaj, i ftuar këtë të martë në studion e “Quo Vadis” të moderatores Pranvera Borakaj në Vizion Plus, ka folur për karrierën e tij.
Malaj tha se në karrierën e tij ka dhënë 9 vendime me vdekje, ku një ndër to ishte në vitet e vështira 1998–2000, siç ishte rasti i vrasjes së tre policëve.
Sipas tij, nëse edhe sot do të kishte raste të tilla, nuk do të hezitonte të jepte sërish të njëjtin vendim, nëse do ta lejonte ligji.
Ndërsa ka treguar edhe historinë e thyerjes së stilolapsit nga ana e gjyqtarit.
Pjesë nga biseda:
Malaj: Kam dhënë 9 vendime me vdekje.
Borakaj: Për çfarë i keni dhënë?
Malaj: Unë kam punuar në një periudhë shumë të keqe, vitet 1998–2000, si gjyqtar në Vlorë. Vrasja e 3 policëve. Kur jep dënimin e parë me vdekje, thyen stilolapsin që mos ta japësh më. Është diçka sublime. Asnjë gjyqtar nuk do t’i marrë jetën tjetrit. Thyerja e këtij stilolapsi është “mos jap më vendime me vdekje”.
Borakaj: Keni pasur dyshime në ndonjë rast?
Malaj: Jo, asnjëherë.
Borakaj: Keni pasur kërcënime?
Malaj: Gjykatësi duhet të dijë nëse është i pastër brenda; nuk ka asnjë lloj kërcënimi. Nëse je i krimbur brenda, nuk je i qetë. Unë u bëj thirrje gjyqtarëve: zbatoni ligjin dhe nuk ju gjen asgjë e keqe.
Borakaj: Po joshje, oferta?
Malaj: Joshje dhe korruptim të drejtpërdrejtë nuk besoj se ekzistojnë; të tërthorta po. Niveli i atyre gjyqtarëve që kanë bërë këto veprime janë larguar nga sistemi. Mendoj që sot sistemi i drejtësisë ka një problem më të madh: lidhjen e gjyqtarëve dhe prokurorëve me krimin e organizuar. Këto janë të dukshme sot. Kanë lidhje familjare. Nëse në kohën tonë të ishe gjyqtar, nuk kishe shans të kishe një familjar të dënuar.
Borakaj: Pse kush e ndalonte?
Malaj: S’të linte ligji. Do merrje certifikatën. Sot një gjyqtare e Apelit të Tiranës bën emërimin në Gjykatën Kushtetuese. Motra e saj i është prishur çështja për korrupsion.
