Në Pallatin e Brigadave u zhvillua mbrëmja gala e edicionit të parë të “TEA Awards 2026”, ceremoni e dedikuar për vlerësimin e turizmit, inovacionit dhe promovimit të destinacioneve shqiptare.
Gjatë ceremonisë u ndanë 35 çmime kryesore, për qytetet më aktive në turizëm, eventet më të kërkuara, atraksionet turistike më të klikuara, që kanë kontribuar në promovimin e turizmit shqiptar përmes platformës digjitale TEA gjatë periudhës 2024–2026.
Çmimin e parë “ TEA ALL SENSES”, për bashkinë me organizimin e numrit më të lartë të eventeve nga të gjithë kategoritë e rrëmbeu Tirana.
“Nga aplikacioni TEA lind një pjesë e mirë e ministrisë së Turizmit, sepse te TEA shohim atë që na bën sot gjithë kjo ministri: të gjitha eventet, spektaklet, kalendarin vjetor, jetën kulturore dhe artistike dhe ngjarjet që kanë të bëjnë me promovimin e Shqipërisë brenda dhe jashtë vendit. Të falenderojmë në mënyrë të veçantë ata që janë gjithsesi në themel të asaj që ndodh me artin e kulturën, të gjitha ato ngjarje dhe evente, pra profesionistët e sektorëve dhe vetë institucionet e vendit, teatrot, AI Kombëtar dhe AI Eksperimental që janë të gjitha ato institucione që bëjnë që aplikacioni TEA të jetë plot me evente, patjetër dhe skena e pavarur ka marrë një forcë të jashtëzakonshme”, tha Blendi Gonxhe, MINiSTËR i Kulturës.
Kjo platformë erdhi si një mjet për promovim të destinacioneve shqiptare, duke reflektuar ndikimin e drejtpërdrejtë të inovacionit digjital në zhvillimin kulturor dhe turistik të vendit.
“Sonte në këtë vend historik si Pallati i Brigadave nuk jemi mbledhur vetëm për të ndarë çmime, por për të celebruar një histori suksesi që po shkruhet çdo ditë në Shqipëri, historinë e një vendi që po zbulon mënyra të reja për të komunikuar me botën. Është simbolike që kjo histori sonte rrëfehet përmes TEA. Vetëm tre vite më parë TEA lindi si kalendar i eventeve të Shqipërisë, si ide e Kryeministrit Rama për të krijuar instrument modern dhe digjital që do të bashkonte në një platformë të vetme jetën turistike, kulturore dhe artistike”, tha Zana Çela
Drejtore e Përgjithshme e Agjencisë Kombëtare të Turizmit.
Një çmim special shkoi edhe për “Melia Durrës”, që rezultoi më e klikuara nga të huajt në aplikacion.
Ky event, i organizur për herë të parë, synon të forcojë rolin e teknologjisë në zhvillimin e turizmit shqiptar.
