Është finalizuar operacioni policor i koduar “Episodet” në Durrës, në kuadër të hetimeve për disa raste vjedhjesh në subjekte tregtare.
Shërbimet e Komisariatit të Policisë Durrës, pas kallëzimeve të bëra nga qytetarë për vjedhje në bizneset që administronin, kanë arritur të zbardhin tre raste të ndodhura në lagje të ndryshme të qytetit, konkretisht në lagjet nr. 1, nr. 15 dhe nr. 17.
Si rezultat i operacionit, u bë i mundur identifikimi dhe arrestimi i autorit të dyshuar, shtetasi R. H., 26 vjeç, banues në Durrës, i cili rezulton me precedentë të mëparshëm në fushën e vjedhjeve.
Nga hetimet ka rezultuar se 26-vjeçari ka kryer vjedhje në tre subjekte, kryesisht markete dhe tabakino, në datat 10 shkurt, 5 mars dhe 9 prill 2026.
Policia bën me dije se hetimet vijojnë për dokumentimin e rasteve të tjera të mundshme ku mund të jetë i përfshirë i riu.
Materialet procedurale i janë referuar Prokurorisë së Durrës për veprime të mëtejshme.
/vizionplus.tv
