Presidenti i SHBA-së, Donald Trump, ka deklaruar se vendimi për momentin se kur do të përfundojë lufta me Iranin do të merret në koordinim me kryeministrin izraelit, Benjamin Netanyahu.
Në një intervistë të shkurtër telefonike për The Times of Israel, Trump theksoi se vendimi nuk do të jetë vetëm i tij, por do të vijë pas konsultimeve me udhëheqjen izraelite.
“Mendoj se është një vendim i përbashkët… deri diku. Kemi qenë duke biseduar. Unë do ta marr vendimin në momentin e duhur, por gjithçka do të merret në konsideratë,” u shpreh presidenti amerikan.
Trump shtoi gjithashtu se, sipas tij, Irani do të kishte shkatërruar Izraelin nëse ai dhe Netanyahu nuk do të kishin vepruar.
“Irani do të shkatërronte Izraelin dhe gjithçka përreth tij. Ne kemi punuar së bashku. Kemi goditur një vend që donte të shkatërronte Izraelin,” deklaroi ai.
I pyetur nëse Izraeli mund të vazhdojë luftën edhe pasi SHBA të vendosë të ndalojë sulmet e saj, Trump shmangu një përgjigje të drejtpërdrejtë, duke theksuar se nuk beson se një skenar i tillë do të jetë i nevojshëm.
/vizionplus.tv
