Sekretari amerikan i Shtetit, Marco Rubio, deklaroi se SHBA-të synojnë të krijojnë një prani diplomatike të përhershme në Venezuelë në “të ardhmen e afërt”, vetëm pak javë pas arrestimit të presidentit Nicolas Maduro gjatë një operacioni ushtarak amerikan në Karakas.
“Ne kemi një ekip në terren që po vlerëson situatën dhe besojmë se mund të hapim një mision diplomatik amerikan së shpejti, që do të na lejojë të marrim informacion në kohë reale dhe të ndërveprojmë,” tha Rubio gjatë një séance dëgjimore para Komitetit të Çështjeve të Jashtme të Senatit.
Ai gjithashtu shtoi se SHBA ka krijuar një linjë komunikimi “të respektueshme dhe produktive” me udhëheqësit e përkohshëm të Venezuelës.
Presidenti Maduro u arrestua më 3 janar së bashku me bashkëshorten e tij dhe u dërgua në Nju Jork, ku pritet të përballet me akuza për “trafik droge”.
Ndërkohë, ish-nënpresidentja u betua si presidente e përkohshme më 5 shkurt, pas deklaratave të presidentit amerikan Donald Trump se SHBA do të “udhëheqë” vendimet e Venezuelës “deri në njoftim të mëtejshëm”.
