Sot po mbahet dita e tretë e samitit në Davos, ndërsa pritet fjala e presidentit amerikan Donald Trump. Përpara nisjes kreu i Shtëpisë së Bardhë dha një intervistë për mediat, duke nënvizuar se Groenlanda është shumë e rëndësishme për SHBA-të.
“Është një copë toke shumë e madhe. Bën shumë ftohtë. Ka shumë akull mbi të. Pra, nuk është se do të ndërtojmë një zhvillim të mirë të pasurive të patundshme apo diçka të tillë. Është në një vend që është shumë i rëndësishëm për sigurinë tonë kombëtare dhe gjithashtu për sigurinë ndërkombëtare. Ne po ndërtojmë Kupolën e Artë dhe Groenlanda e bënë atë kupolë më efektive. Nëse dikush dëshiron të qëllojë raketa, do t’i rrëzojë nga ajri si shkrepëse”, tha Trump.
Në lidhje me një luftë tregtare të mundshme me Evropën nëse nuk do të bjerë dakord për një marrëveshje për Groenlandën, Trump u përgjigj: Unë mendoj se ata e kanë të nevojshme atë marrveshje. Çfarëdo që të bëjnë me ne, unë thjesht do ta pranoj. E tëra çfarë duhet të bëj është ta pranoj dhe do të kthehet mbrapsht. Ndoshta do të jemi në gjendje të gjejmë një zgjidhje, ndoshta edhe gjatë ditëve të ardhshme në Davos.
Trump kishte një përgjigje edhe për kërcënimet e Iranit për një sulm ndaj Shteteve të Bashkuara. Ai tha se nësë diçka e tillë do të ndodhë, do të hakmerrej ndaj të gjithë vendit.
Ndërkohë, aeroplani “Air Force One” ku udhëtonte presidenti Trump drejt Zvicrës befas ndryshoi kurs mbi Atlantik dhe u kthye mbrapsht për shkak të një problemi elektrik.
Sipas mediave Trump është zhvendosur në një aeroplan tjetër për të udhëtuar drejt Davosit për të mbajtur fjalën në forumin Ekonomik Botëror.
