Sekretari i Përgjithshëm i OKB-së, Antonio Guterres, dënoi ashpër sulmet e fundit në shkallë të gjerë me raketa dhe dronë të forcave të armatosura ruse ndaj Kievit dhe qyteteve të tjera të Ukrainës.
Sipas një deklarate të zëdhënësit të tij, sulmet kanë shkaktuar vdekjen dhe plagosjen e dhjetëra civilëve, si edhe dëme të konsiderueshme në infrastrukturën civile.
Guterres shprehu gjithashtu shqetësimin e tij të thellë për përshkallëzimin e vazhdueshëm të konfliktit.
Në të njëjtën kohë, ai dënoi edhe sulmet e fundit me dronë të Ukrainës në disa rajone të Rusisë, të cilat, sipas raportimeve, kanë shkaktuar viktima mes civilëve dhe dëme në infrastrukturën joushtarake.
“Sulmet ndaj civilëve dhe infrastrukturës civile përbëjnë një shkelje të qartë të së drejtës ndërkombëtare humanitare dhe duhet të ndalen menjëherë”, thuhet në deklaratë.
Sekretari i Përgjithshëm shprehu gjithashtu shqetësim të madh për rritjen e rreziqeve ndaj sigurisë së lundrimit në Detin e Zi dhe Detin Azov, si dhe për pasojat e mundshme në sigurinë ushqimore globale.
Ai u bëri thirrje të gjitha palëve të përfshira të garantojnë lirinë e lundrimit në përputhje me të drejtën ndërkombëtare, si edhe mbrojtjen e porteve civile dhe infrastrukturës detare.
