Prefekturat në disa qarqe të vendit kanë publikuar raportin e përditësuar mbi situatën e krijuar nga reshjet e shiut, për datën 10 janar 2026. Sipas të dhënave zyrtare, situata paraqitet përgjithësisht e qëndrueshme, ndërsa strukturat e emergjencave civile vijojnë monitorimin në terren.
Qarku Durrës
Në territorin e Bashkisë Durrës, gjatë natës janë regjistruar reshje shiu me intensitet të ulët dhe mesatar, pa shkaktuar probleme në akset rrugore apo në lumenj. Strukturat bashkiake dhe ato të emergjencave civile ndodhen në terren në koordinim të plotë me Shtabin e Emergjencave Civile.
Situata hidrike në lumenjtë Erzen dhe Ishëm po shkon drejt normalizimit, pas rënies së ndjeshme të nivelit të ujit.
Sa i përket evakuimeve, deri më tani janë evakuuar 848 banorë. Janë hartuar 1 453 akte konstatimi dhe janë verifikuar 4 067 banesa. Rreth 508 specialistë vijojnë vlerësimin e dëmeve në terren, proces që do të vazhdojë edhe në ditët në vijim.
Nga Drejtoria e Rezervave Shtetërore janë siguruar 1 100 pako ushqimore, të cilat janë shpërndarë në zonat më të prekura:
350 pako në ambientet e Kavalishencës dhe Shtëpisë së Pushimit të Ministrisë së Brendshme për qytetarët e strehuar;
400 pako në zonën e Durrësit të Ri (ish-Këneta) dhe në zonën e Plazhit;
350 pako ushqimore në Sukth.
Në Sukth dhe Katund të Ri raportohen rreth 2 800 hektarë tokë bujqësore të përmbytura.
Bashkia Krujë
Në Bashkinë Krujë, reshjet gjatë mbrëmjes në zonën e Fushë-Krujës kanë qenë me intensitet deri mesatar, por pa shkaktuar probleme të reja. Akset rrugore kryesore paraqiten të kalueshme dhe pa prezencë uji.
Nga inspektimet e mëngjesit rezulton se nivelet e lumenjve Gjole dhe Zezë kanë rënie të ndjeshme dhe situata po normalizohet. Gjatë ditës së sotme grupet e punës do të vijojnë inspektimet për vlerësimin e dëmeve në banesa. Ndërkohë, një ditë më parë u përfundua bllokimi i çarjes së argjinaturës së lumit Droje.
Bashkia Shijak
Edhe në Bashkinë Shijak situata paraqitet e qetë. Gjatë natës ka pasur reshje shiu me intensitet të ulët dhe mesatar, pa raportime për problematika të reja.
Strukturat e MZSH-së dhe shërbimet bashkiake kanë ndërhyrë gjatë natës për pastrimin e 5 banesave dhe nxjerrjen e ujit nga 2 banesa.
Qarku Shkodër
Në Bashkinë Shkodër situata mbetet e qëndrueshme, me nivele uji nën kuotat kritike dhe pa banesa të përmbytura. Monitorimi i datës 10 janar 2026, ora 08:00, tregon se lumenjtë Buna dhe Drin janë brenda parametrave të sigurisë, megjithëse kanë shënuar rritje prej 10–20 cm gjatë 24 orëve të fundit.
Niveli i ujit në Bunë, te Ura e Vjetër, është 8.30 m, ndërsa në Urën e Bahçallëkut lumi Drin shënon kuotën 8.05 m. Në njësinë administrative Dajç, niveli i ujit është 6.48 m.
Sipërfaqja totale e përmbytur në territorin e Bashkisë Shkodër vlerësohet rreth 266 hektarë, kryesisht tokë bujqësore. Në njësinë Ana e Malit, rruga për në Obot mbetet e bllokuar për mjetet e ulëta, me nivel uji mbi 50 cm. Janë përmbytur rreth 130 hektarë tokë bujqësore në Obot dhe Muriqan, 35 hektarë në njësinë Dajç dhe 101 hektarë në Velipojë.
Autoritetet bëjnë me dije se ka tendencë tërheqjeje të ujit nga zonat e përmbytura dhe situata është nën monitorim të vazhdueshëm.
Qarku Elbasan
Në qarkun Elbasan, reshjet gjatë natës kanë qenë sporadike dhe me intensitet të ulët, ndërsa gjatë mëngjesit kanë vijuar në të njëjtat kushte. Deri në këto momente nuk raportohen problematika.
Në aksin nacional Elbasan–Qafë Thanë, në vendin e quajtur Dragostunjë, rreth orës 03:00 është ndërhyrë për pastrimin e një masivi dheu, dhe qarkullimi vijon normalisht.
Prurjet e lumit Shkumbin janë mbi mesataren, por pa rrezik për përmbytje. Po ashtu, nuk paraqesin probleme as përroi i Zaranikës dhe ai i Paprit. Vijojnë shkarkimet nga HEC Banjë, ndërsa në orën 09:00 pritet rritje e shkarkimeve deri në 290 m³/sekondë, që së bashku me prodhimin arrijnë në 390 m³/sekondë. Bashkitë Cërrik dhe Belsh janë njoftuar për gatishmëri në zonat përgjatë lumit Devoll.
/vizionplus.tv
