Zyrtarë apo punonjës të administratës të cilët marrin vendime në dëm të qytetarëve do të duhet të paguajnë nga xhepi i tyre dëmshpërblimin. Në Kuvend, deputeti demokrat Bujar Leskaj ka depozituar një projektligj ku parashikohet se çdo dëm i bërë me dashje ndaj pasurive publike do të kompesohet nga vetë zyrtarët apo punonjësit që e shkaktuan.Në dokument, theksohet se ky projektligj synon të rregullojë marrëdhënien midis institucioneve dhe punonjësve të tyre.
“Efektet e këtij ligji shtrihen mbi përgjegjësinë financiare të punonjësve publikë, si dhe çdo personi apo subjekti që kryen funksione shtetërore ose funksione të deleguara, gjatë kohës së punësimit ose të marrëdhënies së punës me subjektin publik në; Njësitë e qeverisjes së përgjithshme, në ndërmarrjet shtetërore dhe në shoqëritë tregtare ku shteti zotëron mbi 50 përqind të aksioneve”, thuhet në Projektligjin “Për Përgjegjësinë Financiare të Punonjësve Publikë”.
Projekligji thekson se sa i përket pasurive publike preken disa sektorë duke nisur nga të mirat materiale, e deri tek vendimet që sjellin dëme në kurriz të qytetarëve.
“Përgjegjësia e plotë: Aplikohet kur dëmi shkaktohet me dashje, si pasojë e një vepre penale, ose kur punonjësi është në gjendje të dehur.
Përgjegjësia e kufizuar: Kur punonjësi ka bërë përpjekje për të zvogëluar pasojat e dëmit.
Përgjegjësia e përbashkët: Për anëtarët e organeve kolegjiale që votojnë pro një vendimi që sjell dëm pasuror.
Përgjegjësia e rënduar: Për humbjen e aktiveve me karakter sensitiv, si armatimet, municionet apo materialet luftarake”, thuhet në projektligj.
Megjithatë, nuk janë subjekt i këtij ligji gjyqtarët dhe prokurorët, për vendimmarrjet e tyre vetë për aq kohë sa janë duke ushtruar detyrën si të tillë. Drafti gjithashtu parashtron se çdo zyrtari apo punonjësi i garantohet e drejta për t’u informuar, për të paraqitur prova dhe për t’u mbrojtur me avokat. Vlerësimi i dëmit do të bëhet me çmimet aktuale të tregut, dhe shlyerja mund të realizohet edhe përmes ndalesave në pagë, të cilat nuk mund të kalojnë 25% deri në 35% të pagës mujore./vizionplus.tv
