“Greqia është në mënyrë të qëndrueshme në favor të perspektivës evropiane të Ballkanit Perëndimor. Por kjo nuk do të thotë se të gjitha vendet trajtohen njësoj. Çdo rast është i veçantë dhe progresi i çdo vendi drejt Evropës vlerësohet individualisht. Natyrisht, varet edhe nga gjykimi i të gjitha vendeve të Bashkimit Evropian se kur do të hapet dhe kur do të mbyllet secili kapitull i negociatave me Bashkimin Evropian”.
Ky mesazh vjen nga kryeministri grek, Kiriakos Mitsotakis, në Konferencën Ndërkombëtare të Selanikut.
Mitsotakis tha se Athina ka ende shqetësime për situatën e minoritetit grek në Shqipëri, veçanërisht sa i takon pronave dhe garantimit të të drejtave të tij.
“Nuk është i mjaftueshëm progresi që është bërë në regjistrimin e pronave dhe në mbrojtjen e të gjitha të drejtave. Dhe të jeni absolutisht të sigurt se, në momentin e duhur, do të ushtrojmë të drejtat tona, në mënyrë që të jemi plotësisht të sigurt se të drejtat e pakicës mbrohen. Dhe e dini, kjo nuk është një çështje dypalëshe. Është një çështje që lidhet me të drejtën evropiane, me mbrojtjen e të drejtave”, tha Mitsotakis.
Megjithatë, kryeministri grek nuk përmendi mundësinë e vetos ndaj Shqipërisë. Përkundrazi, ai e cilësoi Tiranën dukshëm më përpara se Shkupi në procesin e integrimit evropian.
“Maqedonia e Veriut nuk ka përparim të konsiderueshëm në negociatat e pranimit me Bashkimin Evropian. Ky vend është në një fazë shumë më të hershme krahasuar me Shqipërinë”, u shpreh Mitsotakis.
Deklarata e Mitsotakis vjen në një moment kur marrëdhëniet Tiranë-Athinë janë përmirësuar, pas tensioneve të krijuara nga çështja e Fredi Belerit. Një tjetër moment i rëndësishëm pritet në vitin 2027, kur Greqia do të marrë Presidencën e Këshillit të BE-së, ndërsa Shqipëria synon të mbyllë negociatat e anëtarësimit.
/vizionplus.tv
