Synimi i qeverisë shqiptare është që së shpejti të nisë vaksinimin masiv të popullsisë për të ndihmuar veçanërisht biznesin në prag të sezonit turistik. Nga Lezha, kryeministri Edi Rama premtoi se ky proces do të jetë i afërt
EDI RAMA
KRYEMINISTER I SHQIPERISE
“Është shumë e afërt dita ku ne do të fillojmë vaksinimin masiv për të lehtësuar edhe sezonin e ardhshëm turistik. Nëse realizojmë një vaksinim masiv në mars-prill-maj deri në mesin e qershorit do të kemi një sezon turistik shumë më ndryshe. Për të kaluar në një tjetër stad na duhet një tjetër sasi vaksinash, pasi me numrin e siguruar procesi do të jetë më i ngadaltë. Kjo është ëndrra që më lë pa gjumë se si të disponojmë sa më shpejt një numër vrastar vaksinash për virusin.”
Shefi i qeverisë shpjegoi se vendimi për të marre ose jo vaksinat kineze e ruse nuk lidhet me gjeopolitikën.
“Deri dje kënga ime thoshte ‘Çdo gjë bën vaki jetojmë në Tironë’, tani duhet të them ‘Çdo gjë bën vaki jetojmë në Evropë’. Gjermania që është lokomotiva e Evropës, ka filluar të hapë dialogun me Kinën dhe Rusinë për vaksinat ruse dhe kineze. Duket e pabesueshme por është e vërtetë, duket që kontinenti më i fuqishëm i planetit gjendet në këtë situatë. Një gjë dua të shtoj ka shumë njerëz që mendojnë se mosmarrja e vaksinës kineze dhe ruse është çështje gjeopolitike, nuk është kështu, vaksinat nuk kanë dalë në treg që shko atje dhe i ble. Vaksina nuk ka!”
Përvec pandemisë, sfida tjetër për qeverinë është rindërtimi, proces i cili sipas kryeministrit Rama është i pandalshëm. E duke i mëshuar idesë se PS është e vetmja forcë politike që mund të çojë vendin para, Rama ka ironizuar rivalin politik. Sipas kryeministrit Rama, premtimet e Partisë Demokratike janë vetëm për fushatë elektorale duke vënë në dukje se nuk është e mundur që të ulen kontributet shoqërore dhe të rriten pensonet.
