Ministri i Brendhsëm Taulant Balla ka reaguar për ngjarjen e rëndë në Shkodër, ku Alma Arrazi dyshohet se i dha fund jetës së saj dhe të tre fëmijëve duke u hedhur në lumin Buna, për shkak të dhunës së bashkëshortit.
Ai bën thirrje për çdo grua që të denoncojë dhunën, teksa vë në dukje se policia ka ndaluar bashkëshortin e viktimës.
Lexo edhe :
Related Posts
Reagimi i plotë:
Ngjarja e rëndë në Shkodër, ku një nënë dhe tre fëmijët e saj dyshohet se janë vetëmbytur në lumin Buna, na ka tronditur të gjithëve. Njësia e specializuar e RENEA dhe Forca Kombëtare e Sigurisë Publike janë duke vijuar kërkimin e përgjatë gjithë rrjedhës së lumit Buna. Policia e Shtetit ka ndaluar bashkëshortin dhe ka dyshime të forta se dhuna në familje, presioni psikologjik kanë shtyrë viktimën drejt këtij akti tragjik.
Gjej rastin t’i bëj thirrje çdo gruaje të denoncojë çdo lloj forme dhune. Dhuna shpesh manifestohet në shtëpi, mbrapa dyerve të mbyllura, por kjo është një temë që duhet bërë publike. Dhuna ndaj grave nuk është një çështje private. Ajo na intereson të gjithëve. Dhe ne, e gjithë shoqëria, duhet t’i nxisim viktimat e dhunës ta denoncojnë. Nuk mund të ketë #AsnjëJustifikim ndaj dhunës – as në shtëpi, as në vendin e punës, as në jetën publike, as online. Askund! /vizionplus.tv
