Usain Bolt do stërvitet me Borussian e Dortmundit

Usain Bolt do të stërvitet me Dortmundin. Konfirmimi ka ardhur nga zytrari i lart i verdhezinjve, Hans-Joachim Watzke, i cili është shprehur se sportisti më i suksesshëm në historinë e atletikës do t’i bashkohet grupit të skuadrës në disa seanca stërvitore. Bolt, 9 herë medalist në Lojërat Olimpike, është përfolur prej kohësh rreth një mundësie për t’u marrë me futboll. Ai ka deklaruar shpesh se është një simpatizant i këtij sporti, teksa spekulimet kanë përmendur klube si Manchester United apo dhe Reali i Madridit, të cilët interesoheshin rreth një mundësie aktivizimi të tij. “E kemi diskutuar kohë më parë dhe e kemi vendosur, Bolt do i bashkohet skuadrës sonë për t’u praktikuar. Trajneri Thomas Tuchel e pëlqen si ide dhe cdo gjë është folur edhe me Presidentin e Pumas, Bjorn Gulden” – rrëfeu Watzke, i cili konfirmoi kështu lajmin e bërë publik në shtypin gjerman se 30-vjecari shumë shpejt do jetë në Dortmund. Zyrtari i lartë i verdhezinjëve saktësoi se për të mos e shpërqëndruar skuadrën, Bolt do jetë në stërvitje në fazat parapërgatitëse të sezonit, ose gjatë kampionatit gjerman. Xhamajkani, e ka deklaruar se ky do jetë viti i tij i fundit në atletikë, sport prej të cilit do të tërhiqet në gusht. Angazhimi i tij me futboll shihet nga klubet e ndryshme si një mundësi e artë marketingu, ndërkohë që ëndrra për Bolt është të veshë fanellën e Manchester United. / Tring sport