Policia ka zbardhur një ngjarje të ndodhur në datë 25 tetor në Kamëz ku shtetasi Elis Ademi, duke drejtuar mjetin tip “Ford” përplasi qëllimisht mjetin tip “Volksvagen” i cili drejtohej nga shtetasi Ilmi Xhixha dhe më pas u konfliktua fizikisht me të duke përdorur dhe armë zjarri.
Policia arrestoi në flagrancë Elis Ademin, 32 vjeç. Ai është paguar nga shtetasi S. C., për të dhunuar fizikisht Ilmi Xhixhen.
Elis Ademi për kryerjen e kësaj porosie ditën e ngjarjes kishte marrë dhe shtetasin F. M., duke i premtuar një shumë monetare.
Policia ka shpallur në kërkim shtetasit:
– S. C., porositës i dhunimit fizik të I. Xh.
– F. M., bashkëpunëtor i shtetasit Elis Ademi.
Në vijim të veprimeve hetimore policia ka gjetur dhe sekuestruar në cilësinë e provës materiale armën e zjarrit të cilën shtetasi Elis Ademi pas ngjarjes e kishte hedhur në Qerek, në zonën e Fushë Krujës.
