Irani ka hedhur poshtë pretendimet e Presidentit amerikan Donald Trump se është arritur një marrëveshje për t’i dhënë fund konfliktit aktual me Shtetet e Bashkuara, duke deklaruar se asgjë nuk është finalizuar.
Zëdhënësi i Ministrisë së Jashtme iraniane, Esmail Baghaei, tha se raportimet për një marrëveshje janë “spekulative” dhe se “nuk është finalizuar asgjë”, pavarësisht deklaratave të përsëritura të Trump se një ujdi mund të nënshkruhet së shpejti.
Lexo edhe :
Related Posts
Trump ka deklaruar se SHBA do ta godiste Iranin “shumë fort”, por më pas tha se sulmet u anuluan pasi ishte arritur një marrëveshje, duke shtuar se dokumentet janë në fazë përfundimtare dhe mund të nënshkruhen në ditët në vijim, ndoshta në Europë.
Ai pretendoi gjithashtu se marrëveshja do të siguronte që Irani të mos ketë kurrë armë bërthamore dhe se do të hapej edhe Ngushtica e Hormuzit, një nga rrugët kryesore të transportit të naftës në botë.
Megjithatë, nga pala iraniane është theksuar se bisedimet nuk kanë përfunduar dhe se SHBA ka paraqitur kërkesa shtesë që kanë penguar arritjen e një dakordësimi final.
Në sfond të deklaratave, tensionet mes dy vendeve mbeten të larta, me shkëmbime sulmesh dhe operacione ushtarake në rajon gjatë javëve të fundit./vizionplus.tv
