Biznesmeni Ilir shtufi, i shpallur në kërkim nga autoritetet shqiptare për përfshirje të dyshuar në organizatë kriminale dhe pastrim parash, është arrestuar në Selanik të Greqisë. Tashmë pritet që organi kompetent gjyqësor grek të vendosë mbi kërkesën për ekstradimin e tij në Shqipëri.
Shtufi akuzohet për pastrim të produkteve të veprës penale, të ardhura që dyshohet se burojnë nga trafiku i narkotikëve, si dhe për pjesëmarrje në organizatë kriminale.
Sot ai u paraqit para Prokurorisë së Apelit në Selanik, ku u vendos të qëndrojë në paraburgim deri në shqyrtimin e kërkesës për ekstradim nga gjykata kompetente.
Sipas mediave greke, 53-vjeçari ka deklaruar para prokurorit se nuk pranon të ekstradohet në Shqipëri dhe ka mohuar të gjitha akuzat, duke pretenduar se nuk ka asnjë lidhje me çështjen.
Nga hetimet rezulton se ai kishte hyrë në Greqi të premten e kaluar, 2 qershor, përmes pikës kufitare të Kapshticës (Krystallopigi). Në të njëjtën ditë, autoritetet shqiptare zhvilluan një operacion të koordinuar për arrestimin e tij dhe personave të tjerë të përfshirë në këtë dosje.
53-vjeçari u lokalizua dhe u arrestua në një hotel në Selanik nga efektivët e policisë greke, pas informacioneve të shkëmbyera nëpërmjet kanaleve të bashkëpunimit ndërkombëtar policor dhe INTERPOL-it.
Më 12 qershor SPAK zhvilloi një aksion të gjerë kundër 20 personave që dyshohet se kanë kryer pastrim parash nga trafiku masiv ndërkombëtar i kokainës. Nga këto masa, pesë janë arrest shtëpie ndërsa 15 arrest në burg.
Operacioni u shtri në tre qytete të vendit, Tiranë, Durrës dhe Vlorë ndërsa përmes burimesh Vizion Plus mësoi se janë goditur dy grupe kriminale, të cilët të mirëorganizuar kanë bashkëpunuar me njëri tjetrin me role të ndara.
Mes fletëarresteve të prera bën pjesë biznesmeni i shumëpërfolur, Artur Shehu i cili gëzon pronësinë e pjesës më të madhe të Zvërnecit, por masa për të nuk është ekzekutuar pasi ai ndodhet në SHBA me azil politik. Sipas organit të akuzës ai akuzohet për pastrim parash, i financuar nga vëllezër narkotrafikantë, Erion dhe Adrian Rama.
SPAK me kërkesë të dy prokurorëve të posaçëm, Altin Dumani dhe Elida Kaçkini kanë urdhëruar edhe arrestimin e vëllezërve Koçeku, Arturit që dyshohet si koka e grupit kriminal, Abedinit dhe Ervinit.
As ata nuk u vunë pas hekurave, sepse ndodhen në Dubai, por SPAK ka arritur të provojë trafikun transnacional të drogës që ata kanë kryer nga vendet e amerikës latine.
Sipas prokurorisë ishte biznesmeni Ilir ShtufI, për të cilin është nxjerrë urdhëri i arrestit në burg, ai që pastronte paratë e tyre.
Shtufi u arrestua në Greqi, ndërsa në qeli për po të njëjtën vepër penale përfundoi biznesmeni Orest Sota.
Nën sekuestro u vunë rreth 128 milionë euro në llogarinë e noteres Amela Mukaj, të përdorura në 3 shitblerje tokash në Zvërnec. Po ashtu janë sekuestruar me mijëra hektarë tokë, 7 vila në Palasë, 2 në Rolling Hills, në Jalë dhe Sarandë llogari bankare, mbi 20 apartamente, qindra garazhde dhe mbi 50 llogari bankare.
