Presidenti amerikan Donald Trump pritet të mbërrijë në Britaninë e Madhe për një vizitë tre ditore.
Ai dhe Zonja e Parë Melania do të mirëpriten nga familja mbretërore. Sipas mediave të huaja programi përfshin paradë ushtarake, vendosje kurore në varrin e Mbretëreshës Elisabeth, një fluturim spektakolar nga Red Arrows dhe avionët F-35, si dhe një darkë shtetërore.
Ai do të ketë diskutime edhe me kryeministrin Keir Starmer. Vizita e kreut të Shtëpisë së Bardhë pritet të thellojë lidhjet ekonomike midis dy aleatëve. Zyrtarë të lartë amerikanë kanë paralajmëruar se do të firmosen marrëveshje ekonomike me vlerë mbi 10 miliardë dollarë.
Dy vendet do të nënshkruajnë një marrëveshje tregtare e cila bazohet në tre shtylla kryesore: Një bashkëpunim i ri në fushën e shkencës dhe teknologjisë, bashkëpunim në fushën e energjisë bërthamore për qëllime jo-ushtarake, si dhe zgjerim i bashkëpunimit në fushën e teknologjisë së mbrojtjes.
Ndërkohë Google njoftoi se do të investojë 5 miliardë paund në Britaninë e Madhe, në prag të vizitës zyrtare të presidentit amerikan.
Kompania amerikane e teknologjisë njoftoi gjithashtu hapjen e një qendre të re të të dhënave pranë Londrës, e cila do të ndihmojë në përmbushjen e kërkesës në rritje për shërbimet e saj të fuqizuara nga inteligjenca artificiale.
Ky lajm shihet si një përforcim për qeverinë e kryeministrit Keir Starmer, që synon të tërheqë investime private për të stimuluar ekonominë e ngadalësuar dhe për të rritur mbështetjen në sondazhet kombëtare.
