Kryetarja e LSI, Monika Kryemadhi sulmoi shumë ashpër ndërkombëtarët pasditen e kësaj të marte. Në një takim që mbajti në Durrës, ajo i akuzoi partnerët se janë të verbër për sa kohë që nuk reagojnë për shkeljen që mazhoranca po i bën Kushtetutës.
“Ne nuk mund të vazhdonim më të bëheshin të verbër si disa ndërkombëtarë. Ndërkombëtarët nuk flasin për shkeljen që iu bë kushtetutës. Shumë ndërkombëtarë i kanë kërkuar Kuvendit dhe presidentit që për shkeljet t’i drejtohen Venecias. Pa ardhur Komisioni i Venecias këta e rrëzuan. A mund të më thonë këta ndërkombëtarë sot se ku është kushtetuta sot. Ne nuk kemi Kushtetutë.”
Më tej, ajo foli edhe për rrëzimin e qeverisë. Sipas Kryemadhit, opozita mund të vijë në pushtet vetëm përmes dialogut me popullin dhe jo me anë të rrugës.
“Ne si opozitë sot e diskutuam që zgjidgjen politike nuk mund ta marrin përmes rrugës. Edi Rama do konflikt, do ankand të shesë dhe të blejë deputetë, ambasadorë media. Ne nuk e mundim dot Edi Ramën në lidhjet e tij me krimin e organizuar. Ne mund ta mundim me votë. Për ta mundur Edi Ramën duhet të flasim me popullin. Ne do krijojmë punësimin për të rinjtë dhe të rejat. Ne e bëjmë këtë gjë sepse e kemi ditur dhe kemi treguar që dimë ta bëjmë.”
