Pas pesë ditësh kërkime, policia ka gjetur trupat e pajetë të Vilson Çutaj dhe Klement Pepaj. Ata u ekzekutuan me breshëri automatiku rreth 250 metra larg një parcele kanabisi në malin e Rrencit. Zonë kjo, ku banorët dëgjuan dhe të shtënat me armë ditën kur u zhdukën të rinjtë.
37-vjeçari Vilson Çutaj dhe 21-vjeçari Klement Pepaj dyshohet se u qëlluan nga kushëriri i tyre, 25-vjeçari, Danjel Pepaj, personi i tretë i zhdukur. Dyshimet e policisë se autori i krimit është 25-vjeçari u forcuan akoma më shumë pas gjetjes së pajetë të dy të rinjve.
Nga informacionet e deritanishme rezulton se Danjel Pepaj ishte në konflikt me dy kushërinjtë e tij për shkak të parcelave me kanabis. Vilson Çutaj së bashku me Klementin besohet se dhunuan fizikisht Danjel Pepajn pak ditë para se të ndodhte ngjarja. Konflikt që pasoi më pas dhe me vrasjen e dy kushërinjve.
Pas krimit, Danjel Pepaj mund të jetë arratisur në Mal të Zi. Ngjarja e rëndë ndodhi pasditen e të shtunës në fshatin Vrith të Malësisë së Madhe, ndërsa një ditë më vonë familjarët bënë denoncimin në polici pasi të rinjtë nuk u kthyen në shtëpi.
