Ministrja e Drejtësisë, Etilda Gjonaj njoftoi këtë të mërkurë pezullimin nga detyra të drejtorit të burgut të Drenovës dhe dy punonjësve të tjerë për lirimin nga burgu të Gert Gjinarari, i cili ishte dënuar me burgim të përjetshëm.
Në një dalje për mediat, Gjonaj tha se lirimi i Gjinararit nga burgu është bërë në shkelje të plotë me ligjin.
Ajo deklaroi se i është drejtuar Këshillit të Lartë Gjyqësor dhe Inspektoratit për të kërkuar nisjen e procedimit disiplinor edhe për gjyqtarin që dha vendimin.
“Nga hetimi rezulton se vendimi pavarësisht se nuk është i formës së prerë është dhënë në kundërshtim me kriteret ligjore dhe kriteret e kodit penal. Ministria e Drejtësisë i është drejtuar KLGJ dhe inspektoriatit të Lartë Shtetëror për inicimin e hetimit disiplinor për gjyqtarin. Shpreh besimin se Prokuroria, Këshilli i Lartë Gjyqësor dhe Inspetorati do të veprojnë shpejt dhe do të marrin të gjitha masat e nevojshme për hetimin administrativ dhe penal në lidhje me këtë çështje. Pavarësisht se Vettingu është në vijim, paralelisht me të gjitha rastet dhe vendimet skandaloze do të hetohet për të vënë para drejtësisë”, tha Gjonaj.
