Qytetarë të Bashkisë Maliq kanë protestuar kundër hartës së re territoriale të propozuar nga mazhoranca, e cila parashikon shkrirjen e Bashkisë Maliq dhe bashkimin e saj me Bashkinë Korçë. Protestuesit e cilësuan këtë vendim të padrejtë, duke kërkuar që Maliqi të ruajë statusin e bashkisë.
Një prej zërave të protestës ishte edhe Jurgen Isufllari, punonjës i Bashkisë Maliq, i cili u shpreh se ndihet i tradhtuar nga kolegët e administratës, pasi sipas tij, ata duhej të ngriheshin në mbrojtje të institucionit ku punojnë dhe të drejtave të qytetarëve.
“Unë kam qenë i pari që kam nisur këtë protestë, kam bërë thirrje sepse kam kuptuar që diçka e pisët dhe diçka e keqe po luhet për këtë qytet. Në fakt, unë vij nga një fshat këtu dhe më vjen shumë keq që nuk po shikoja asnjë nga Maliqi. Është e çuditshme se kush e ka hedhur ose kush e ka nxjerrë nga goja shkrirjen e Bashkisë Maliq dhe kush e ka firmosur. Pra, dua të di se cila është ajo dorë që ka firmosur shkrirjen e këtij qyteti dhe jo të kësaj godine, sepse kjo në fund të fundit është një godinë, por qyteti është ai që do të shkrihet dhe këtu nuk do të ketë më asnjë funksion, nuk do të ketë më asnjë kafene, asnjë furrë buke dhe këtu do të ngelet një xhep edhe nuk do të ketë më asnjë gjë që do të kalojë. Pra, jemi një bashki e madhe me 81 fshatra, me 31 mijë banorë dhe kemi një shtrirje shumë të madhe. Pra, jemi nga bashkitë më të mëdha që ne mund të quheshim shumë mirë një bashki bujqësore sepse territori është një fushë dhe ne nuk kemi se si mund të bashkohemi me Korçën. Ne nuk kemi asnjë problem me Korçën, por Korça mund të jetë e fokusuar tek turizmi dhe ne tek bujqësia. Unë jam shumë i zhgënjyer sot me administratën dhe ndjehem shumë i tradhtuar. Nuk kam frikë t’i them gjërat siç janë, ndjehemi i tradhtuar nga të gjithë kolegët sepse sot më duket sikur jam i shitur nga ata, por unë do të luftoj për ata, do të jem këtu edhe kur të kaloj këtu në Maliq do të kaloj me kokën lart. Në fakt unë edhe në postimet e mia i kam bërë thirrje të gjithë deputetëve, qoftë edhe ai që ka marrë një votë, që ka përgjegjësi dhe nuk duhet të votojë shkrirjen në parlament të Bashkisë Maliq”, tha Jurgen Isufllari, punonjës i Bashkisë Maliq.
Edhe anëtarë të Këshillit Bashkiak të Maliqit nga opozita deklaruan se nuk do të japin miratimin për shkrirjen e bashkisë. Ata bënë të ditur se kanë kërkuar zhvillimin e një mbledhjeje emergjente të Këshillit Bashkiak, ku do të shqyrtohet një rezolutë kundër këtij vendimi.
Gjatë protestës nuk munguan as reagimet e ashpra të banorëve. Njëri prej tyre akuzoi kryeministrin Edi Rama se ka tradhtuar edhe socialistët e Maliqit, ndërsa një tjetër tha se, nëse bashkia shkrihet, qytetarët do të detyrohen të përshkojnë rreth 65 kilometra deri në Korçë edhe për shërbimet më të thjeshta administrative.
Bashkia Maliq përfshin mbi 60 fshatra dhe ka rreth 30 mijë banorë. Ajo renditet ndër bashkitë më të mëdha të vendit për nga numri i popullsisë. Banorët kërkojnë që çdo ndryshim i hartës territoriale të bëhet në konsultim me komunitetin dhe institucionet vendore, duke paralajmëruar se do të vijojnë kundërshtimin e tyre ndaj projektit për shkrirjen e bashkisë.
