Situata me zjarret në Greqi mbetet alarmante.
Një vatër e re shpërtheu në ishullin e Kefalonisë duke mobilizuar menjëherë forca të shumta zjarrfikëse, mjete tokësore dhe ajrore.
Për banorët u dërgua mesazh nga sistemi i emergjencës që të jenë në gatishmëri, ndërsa flakët u perhapen pranë zonave të banuara, por pa rrezikuar seriozisht shtëpitë.
Gjatë gjithë natës, zjarrfikësit vijuan operacionet për të mbajtur nën kontroll vatrat më problematike në Atikë, Beoti dhe Fokidë, ku erërat e forta dhe temperaturat e larta e kanë bërë shumë të vështirë shuarjen e zjarreve.
Në juglindje të Francës, një zjarr i madh në rajonin Var, i cili ishte vënë nën kontroll disa ditë më parë, u riaktivizua duke detyruar evakuimin e rreth 2 500 personave gjatë natës.
Zjarri ka djegur rreth 1 800 hektarë tokë, ndërsa zjarrfikësit vijojnë punën për të mbajtur nën kontroll flakët.
Edhe Spanja vijon të përballet me disa vatra zjarresh megjithese vetëm pak ditë pasi qeveria shpalli përfundimin e emergjencës kombëtare për shkak të zjarreve të mëdha.
Në provincën e Leonit disa vatra mbeten aktive, ndërsa në Zamora situata e zjarrit që dogji rreth 11 mijë hektarë është përmirësuar dhe në disa qytete banorët që ishin evakuar janë rikthyer.
Zjarri në Vall d’Uixo, që zgjati shtatë ditë dhe dogji rreth 10 mijë hektarë, është stabilizuar. Policia po heton mundësinë e zjarrvënieve të qëllimshme, pasi u zbuluan dy pika të ndryshme nisjeje të vatrës.
