Ish-drejtues dhe punonjës të Drejtorisë së Përgjithshme të Burgjeve, janë përfshirë në një skemë mashtrimi të qytetarëve, duke krijuar perceptimin e gabuar se janë punësuar. Ngjarja ka ndodhur në Shkodër dhe shkaktarë të kësaj skeme, sipas ministrisë së drejtësisë janë Ardit Hotaj, me funksion politik, koordinator i LSI në Malësinë e Madhe, si dhe kandidatët për deputetë në qarkun Shkodër. Ministri Gazmend Bardhi ka urdhëruar përpara disa ditësh hetim për këtë çështje, ndërsa ka kallëzuar sot penalisht këtë rast në organin e Prokurorisë dhe në Policinë e Shtetit.
