Ish-deputeti i Partisë Demokratike, Ervin Salianji, ka reaguar pas procesit të brendshëm zgjedhor në PD, duke e cilësuar atë si një “farsë për uzurpimin e partisë”.
Salianji shkruan se procesi është bojkotuar nga demokratët dhe se pjesëmarrja ka qenë shumë e ulët në të gjitha degët e vendit.
Ai ka publikuar edhe shifrat e pjesëmarrjes sipas tij deri në orën 18:00, që në total arrijnë në 3,885 votues.
“Braktisje totale e farsës për të uzurpuar PDSh!
Demokratët përbuzën dhe poshtëruan provokimin për gjasme zgjedhje; pjesëmarrja ne degët qëndër qarku deri në përfundim në orën 18:00;
Votues që morën pjesë: 3,885
Tiranë 1,072
Durrës 321
Kukës 370
Korçë 165
Dibër 194
Lezhë 345
Elbasan 256
Berat 141
Vlorë 210
Gjirokastër 120
Fier 220
Shkodër 471
Tani teatri me shtyrje orari ishte i tepért, votojnë miliona shqiptarë dhe nuk shtyhet si mund të shtyhet tek degët e medha qe ne total kanë as 20.000 votues sipas uzurpatorit por nderkohë nuk kanë votuar as 4000 gjithsej”, shkruan Salianji.
Demokratët votuan sot për t’i dhënë një mandat të ri në krye të PD, liderit historik Sali Berishës. Sali Berisha ishte i vetmi kandidat në fletën e votimit, ndaj PD e ka cilësuar procesin një referendum për konfirmimin e tij dhe vetë Berisha përsëriti se ky është një proces demokratik.
Partia Demokratike përjashtoi nga kjo garë ata kandidatë që kërkuan të dalin përballë Sali Berishës, mes të cilëve edhe ish-deputetin Ervin Salinjin. Sipas Berishës, Salianji nuk mund të jetë pjesë e PD dhe e garës duke e akuzuar për lidhje me krimin
Sali Berisha është zgjedhur për herë të parë kryetari i PD në vitin 1991 dhe për më shumë se 3 dekada ai ka dominuar Partinë Demokratike. Ai u rikthye në krye të PD në vitin 2022 pasi shkarkoi kryetarin Lulzim Basha i cili vendosi përjashtimin e tij nga grupi parlamentar për shkak të shpalljes “non grata”.
Një nga premtimet kryesorë të lëvizjes që riktheu Berishën në krye të PD ishte vendosja në statut e detyrimit që kryetari i partisë kur humbet zgjedhjet jep dorë heqjen dhe nuk ka të drejtë të rikandidojë.
