Ish deputeti Ervin Salianji ka shtuar akuzat në drejtim të kreut të PD Sali Berisha, duke deklaruar se ky i fundit është politikani i vetëm në selinë blu që është faktuar nga gjykata perëndimor si person i lidhur me krimin e organizuar. Këtë pohim të tij, Salianji e ka bazuar në disa vendime gjyqësore, të cilat i ka bërë publike në rrjetin e tij social.
“Sali “kolltuku” i damkosur, jo i akuzuar kot! Sali “kolltuku”, alias Sali “brava”, është sot i vetmi politikan në Partinë Demokratike i faktuar nga një gjykatë perëndimore si i lidhur me krimin e organizuar dhe si politikan që i ka përdorur këto lidhje për influencë politike.
Jo nga gjykatat e kapura të regjimit në Shqipëri. Por nga qeveri të djathta perëndimore dhe nga gjykata britanike. Ky është fakt. Jo propaganda”, tha Salianji.
Në një postim në rrjetin social Facebook, Salianji më tej ka komentuar edhe takimin që Berisha pati këtë të dielë në Dibër. Sipas tij, numri i ulët i pjesëmarrësve tregon braktisjen që demokratët po i bëjnë Berishës.
“Shfaqja e sotme në Dibër ishte tabloja më e qartë e rënies dhe tregoi pse ky uzurpator nuk bën garë! Një sallë që nuk mbush dot as dy kate me 200 persona, megjithëse ishte mbledhur i gjithë qarku.
Një lider i braktisur nga demokratët. Dhe një monolog i mbushur me mashtrime të vjetra. Kur të lë populli, të mbetet vetëm zëri… dhe ai kthehet në zhurmë!
I njëjti model, i njëjti mentalitet”, shkruan Salianji.
Ish deputeti përmendi edhe promovimin që Berisha i bëri Lulzim Bashës vite më parë, e që sot ky i fundit është i larguar nga partia.
“Lulzim Basha ishte “familjari i dashur” i Saliut: e promovoi, e përdori dhe e mbrojti.
Sot, edhe pasi u largua Basha, modeli mbeti po ai:
* i njëjti ekip
* të njëjtat vese
* e njëjta mënyrë përzgjedhjeje deputetësh
* e njëjta “opozitë” që ulet në gjunjë për leje, tendera dhe pazare me Ramën
Ka vetëm një ndryshim:
Saliu sot është i refuzuar nga ndërkombëtarët, nga shoqëria dhe gjithnjë e më shumë nga vetë demokratët”, tha ai.
Për Salianjin, në PD nuk ka garë, pasi Berisha ka frikë prej saj.
“Prandaj nuk bën garë. Prandaj ka uzurpuar PD-në si frikacak.
Sepse gara e nxjerr zbuluar dhe humb privilegjet dhe paratë per te cilat shet shpirtin! Sot nis publikimin e fakteve. Poshtë është një fakt i zi mbi të bardhë:
Vendimi i gjykatës britanike konfirmon se nuk bëhet fjalë për thashetheme, por për prova të mjaftueshme që lidhin Sali Berishën me korrupsion dhe krim të organizuar. E vërteta e hidhur”, shkruan Salianji.
Berisha sot është i përjashtuart nga ndërkombëtarët, thekson më tej Salianji, teksa shton se PD duhet të ndahet nga e shkuara e korruptuar ose të mbetet pengu i saj.
