Replika për “Rilindjen” e Durrësit

Zhvillimi urbanistik i Durrësit ka shkaktuar replika në distancë mes kryeministrit Edi Rama dhe deputetit demokrat Oerd Bylykbashi. Në një postim në Facebook, kreu i qeverisë shkruan se Durrësi është një tjetër shembull domethënës i rilindjes urbane. Sipas tij, me përfundimin e projektit të transformimit urban të zonës së plazhit, Durrësi do të njohë një hop të ri zhvillimi turistik qysh vitin e ardhshëm. Por deputeti durrsak i opozitës, shkruan se nuk ka rilindje për Durrësin, pasi nuk ka furnizim me ujë, dritat ikin dhe e gjithë zona e plazhit është betonizuar nga pallatet. Bylykbashi shkruan se vitin e kaluar u shpenzuan 2 milion euro per rrugën e plazhit, me palma e llampa, ndërkohë që tani shqepet përsëri rruga dhe futen ne xhepat e qelbur milionat. Bylykbashi thekson gjithashtu se jane dhënë leje ndërtimi nga pushtetarët socialiste edhe ne zonat arkeologjike në qytetin bregdetar.