Menaxhimi i pandemisë së koronavirusit ka përplasur ashpër në rrjetet sociale kryetarin e PD Basha dhe kryeministrin Edi Rama.
Lideri i opozitës postoi një video e cila sipas tij tregon se qeveria ka humbur kontrollin ndaj pandemisë dhe po shkatërron jetët dhe shëndetin e familjeve shqiptare. Pas kësaj reagoi ashpër kryeministri Edi Rama i cili e akuzoi se po e përdor për përfitime politike pandeminë.
EDI RAMA
KRYEMINISTER I SHQIPERISE
“Një opozitë që as në një sëmundje që bie një herë në shekull nuk gjen dot forcë të bëhet bashkë me shumicën nuk i duhet as dreqit e jo më popullit shqiptar!”
Kreu i PD iu kundërpërgjigj në twitter duke përsëritur se sistemi shëndetësor është në kolaps.
LULZIM BASHA
KRYETAR I PD
“Rama je një dështim i madh. Sa shqiptarë duhet të vdesin që të ndalësh sulmet politike dhe përpjekjet për të na mbyllur gojën? Po të më kishe dëgjuar që para 6 muajsh, do t’ju kishe dhënë ndihmë financiare familjeve shqiptare dhe sot do të kishe një plan real kundër pandemisë.”
Rritja e numrit të personave të infektuar nga koronavirusi ka bërë që debati politik të fokusohet vetëm tek menaxhimi që qeveria po i bën pandemisë së koronavirusit.
