Kreu i Partisë Demokratike Lulzim Basha ka konfirmuar se opozita e bashkuar do të ketë një kandidat për kryeministër dhe është ai. Basha tha mes të tjerash se shumë shpejt do të bëjnë publike strategjinë e opozitës se si do të garojnë në zgjedhje. Sipas tij, një gjë është e sigurt se do të ketë një koalicion dhe një program opozitar.
I ftuar në Spotlight nga Alban Dudushi, në Vizion Plus, kryetari i Partisë Republikane, Fatmir Mediu, u shpreh se koalicioni opozitar duhet të jetë më i gjerë duke përfshirë dhe partitë e reja. Sipas tij, edhe figura si Topalli, Patozi, mund të kontribuojnë në fitoren e opozitës dhe largimin e Ramës si kryeministër.
Fatmir Mediu: Ajo që unë do të thosha sot, është koha që ne duhet të mendojmë organizimin. Mendoj që paragjykimet janë normale, sepse njerëz jemi. Paragjykime kemi për njërin, për tjetrin, qejfmbetje kemi me njëri-tjetrin. Por, këto nuk është se janë për herë të parë. Kanë ekzistuar edhe më përpara. Prandaj duhet një gjykim më i hapur që të ketë një koalicion të përgjithshëm opozitar dhe besoj do ishte më i vlefshëm në këtë koalicion opozitar dhe nga pikëpamja elektorale dhe zonja Topalli dhe z. Patozi, si njerez që kanë një lidhje, një kontribut në strukturat e PD-së, që nuk mund t’u mohohet. Dhe kjo do të vinte në shërbim të një fuqie më të mirë për fitoren opozitare. Çdo lloj portreti mund t’i shtohet grupit opozitar. Si fillim do të doja figurat e reja, po asgjë nuk është për tu neglizhuar në opozitë.
Alban Dudushi: Kur keni parasysh koalicion opozitar, po mendoni një listë të përbashkët ku përfshihen edhe këta?
Fatmir Mediu: Avantazhi i opozitës, është që ka një koalicion partish, ndryshe nga Rama që nuk ka. Koalicioni i partive nuk duhet të kufizohet këtu, sepse kemi dhe aleatë të tjerë dhe kemi ndërtuar marrëdhënie edhe jashtë kampit të djathtë. Duhet patjetër të gjejmë një mundësi se si duhet të kemi një kuptim të përbashkët brenda kampit të djathtë, pavarësisht nga divergjencat apo opinionet dhe paragjykimet që kemi për njeri-tjetrin. Mund t’i kemi pasur kohë më përpara, mund t’i kemi dhe tani. Por, a ka pasur paragjykim, nga ana jonë në atë kohë edhe për figurat të cilat ishin kundër Berishës? I pari që e theu atë paragjykim ishte z. Berisha dhe ata vetë që u afruan. Pra, ka mundësi që qëllime të drejta dhe të sakta për ndërtimin e një shteti Europian të ketë një qasje dhe një orientim me të mirë, të çdo faktori politik.
Çfarë problemi ka ky sistem sot, se po të ishte sistem tjetër do ishte më ndryshe? Sot ka një problem shumë të madh, në qoftë se vota nuk kthehet në mandat, shkon dyfish në interesin e kundërshtarit politik. Dhe unë kam bindjen që s’i z.Patozi dhe znj.Topalli dhe të tjerët nuk e duan Ramën kryeministër dhe duke qenë kështu duhet të shikojmë që t’i bëjmë efektive votat, t’i kthejmë në mandate, por të mos shkojnë në interes të Partisë Socialiste.
