Detaje të reja janë bërë të ditura për ngjarjen e rëndë të regjistruar mëngjesin e sotëm në Shkodër, ku 24-vjeçari Ylber Luli humbi jetën pasi u qëllua me armë zjarri, ndërsa babai i tij, Qamil Luli, mbeti i plagosur.
Gazetari i Vizion Plus, Bepin Kolvata mëson se gjithçka dyshohet se ka nisur pas një konflikti mes viktimës dhe Andri Vulajt, autor i dyshuar i ngjarjes.
Lexo edhe :
Përplasja e parë mes tyre ka ndodhur gjatë orëve të mbrëmjes në një lokal në zonën e Gjuhadolit. Më pas, rreth orës 05:00 të mëngjesit, Vulaj ka shkuar në banesën e Ylber Lulit, me pretendimin se do të sqaronin konfliktin.
Sipas hetimeve paraprake, ai kishte me vete edhe një pistoletë. Gjatë bisedës, situata është përshkallëzuar dhe mes dy të rinjve ka nisur një përleshje fizike.
Në konflikt është përfshirë edhe babai i viktimës, Qamil Luli. Policia e Shkodrës dyshon se gjatë përleshjes, babë e bir kanë plagosur me thikë Andri Vulajn.
Në vijim të konfliktit, ky i fundit dyshohet se ka nxjerrë pistoletën dhe ka qëlluar në drejtim të 24-vjeçarit, duke i shkaktuar plagë të rënda që i morën jetën.
Pas marrjes së njoftimit, forcat e policisë kanë mbërritur në vendngjarje dhe kanë nisur menjëherë veprimet hetimore.
Efektivët kanë bërë ndalimin e Andri Vulajt, ndërsa kanë sekuestruar edhe armën e cila dyshohet se është përdorur në ngjarje.
Nga veprimet e para hetimore mësohet se Ylber Luli kishte qëndruar deri në orët e vona pranë banesës së tij, brenda automjetit, së bashku me një person tjetër.
Rreth orës 02:00 pas mesnate, ai është futur në banesë. Afërsisht tre orë më vonë, Vulaj është paraqitur në shtëpinë e tij, ku pas përplasjes fizike dhe plagosjes me thikë, dyshohet se ka qëlluar me armë ndaj Ylber Lulit.
Policia dhe grupi hetimor vijojnë punën për dokumentimin e plotë të rrethanave të ngjarjes, përcaktimin e dinamikës së konfliktit dhe zbardhjen e plotë të përgjegjësive.
