Partia Demokratike prezantoi këtë të enjte programin e saj politik për 4 vitet e ardhshme. Kryedemokrati Lulzim Basha u zotua se në Shqipëri nuk do të ketë më qytetarë që nuk kanë mundësi të paguajnë për ushqimin, ujin dhe dritat.
Anëtari i Këshillit Kombëtar të PD, Mateo Spaho theksoi në edicionin qendror të lajmeve në “Vizion Plus” se thjeshtëzimi maksimal i taksave dhe tatimeve, është një nga pikat më të forta të planit ekonomik të demokratëve.
“Ka shumë pika të forta. Thjeshtëzimi maksimal sa i përket taksës dhe tatimeve, me nivelin e normës 9 për qind. Më pak taksa ndaj bizneseve, në mënyrë që të investojnë më shumë dhe të kemi një rritje ekonomike dhe punësim më të lartë.”
I pyetur se cilat do të jenë burimet që do të kompensojnë uljen e të ardhurave nga ulja e taksave, Spaho sqaroi se kur zvogëlohen taksat, njerëzit nuk kanë leverdi të fshehin realitetin dhe të bëjnë evazion.
“Edhe në të kaluarën ka ndodhur kjo gjë; kur taksat janë ulur dhe janë thjeshtëzuar, të ardhurat në një vend si Shqipëria janë rritur. Thjeshtëzimi i taksave në Shqipërinë 2006-2007 solli 500 milionë dollarë më shumë në buxhetin e shtetit. Kur vendos taksë të sheshtë, njerëzit nuk kanë më leverdi që të faturojnë apo të fshehin të ardhurat e tyre. Kur kemi thjeshtëzim apo zvogëlim të taksave, njerëzit nuk kanë leverdi të fshehin realitetin dhe të bejne evazion. Ne duam ta bëjmë të paleverdisshëm evazionin fiskal.”
Një tjetër propozim i PD është edhe rritja e pagës minimale për katër vite.
“Në programin tonë kemi propozuar rritje të pagës minimale për katër vite, nga 30 mijë lekë në 36 mijë lekë. Kjo nënkupton edhe rritje të sigurimeve shoqërore. Zoti, Atdheu, Familja, janë tre fjalët magjike të së djathtës evropiane. Është një program që ndihmon biznesin që të investojë. Nga krahu tjetër ndihmon formimin e familjeve të reja shqiptare. Shumë shqiptarë po lënë veten. Ne po japim përgjigjet tona që shqiptarët të shohin të ardhmen e tyre në Shqipëri.”
