Deputetët e Kuvendit të Kosovës nuk arritën mbrëmë, më 28 prill, të zgjedhin presidentin e ri brenda afatit kushtetues, duke çuar në shpërndarjen e Kuvendit dhe hapjen e rrugës për zgjedhje të reja që pritet të mbahen brenda 45 ditëve.
Pas zhvillimeve politike, të mërkurën, më 29 prill, ish-presidentja e Kosovës, Vjosa Osmani, reagoi përmes një video-mesazhi në rrjetet sociale, ku e cilësoi mbrëmjen e së martës si një moment të vështirë për vendin.
Ajo u bëri thirrje qytetarëve për unitet dhe qetësi, duke theksuar nevojën për të shmangur përçarjet dhe gjuhën e urrejtjes.
“Mbrëmë ka qenë një natë e rëndë për Kosovën. Ka ardh momenti që të japim dashni për vendin tonë, mjaft më me propagandë, me urrejtje e përçarje e ndjellje të frikës. Aty ku ka urrejtje duhet të sjellim dashni për njëri-tjetrin. Aty ku ka frikë duhet të sjellim shpresë, aty ku ka propagandë e shpifje duhet ta mbrojmë të vërtetën”, u shpreh Osmani, duke shtuar se qytetarët duhet të bashkohen për të çuar përpara vendin.
/vizionplus.tv
