Policia e Shkodrës, në bashkëpunim me Forcat e Ndërhyrjes së Shpejtë (FNSH) Tiranë, vijon me intensitet të lartë operacionin antikanabis të koduar “Koordinata”, i cili synon parandalimin dhe goditjen e kultivimit të bimëve narkotike në territorin e qarkut.
Në kuadër të këtij operacioni, janë evidentuar dhe asgjësuar gjithsej 16 755 bimë të dyshuara narkotike të llojit Cannabis Sativa, si dhe janë sekuestruar 320 kilogramë degë kanabisi me boçe, të prera dhe në proces tharjeje.
Rezultatet sipas njësive:
Komisariati i Policisë Shkodër: Në zonat malore të njësive administrative Pult, Shalë, Postribë dhe Shosh, u gjetën dhe u asgjësuan 15 852 bimë kanabisi, ndërsa u sekuestruan 320 kg degë të thata me boçe.
Komisariati i Policisë Malësi e Madhe: Në territorin e njësisë administrative Kastrat, u zbuluan dhe u asgjësuan 429 bimë narkotike.
Komisariati i Policisë Vau i Dejës: Në zonat e Shllakut dhe Temalit, u asgjësuan 474 bimë të dyshuara kanabis.
Policia ka nisur hetimet për të identifikuar dhe arrestuar autorët e këtyre rasteve të kultivimit të bimëve narkotike. Operacioni “Koordinata” do të vijojë në ditët në vijim me kontrolle intensive në terren, me qëllim parandalimin e kësaj veprimtarie kriminale.
/vizionplus.tv
