Adriatik Lapaj dhe “Shqipëria Bëhet” protestuan për rreth dy orë para kryeministrisë duke kërkuar largimin e Edi Ramës dhe krijimin e një qeverie teknike.
Lapaj akuzoi kryeministrin Ramën dhe qeverinë për korrupsion duke mbështetur këto akuza mbi dosjet e SPAK-ut për zëvendëskryeministren Belinda Balluku dhe tenderat e AKSHI-t.
“Këta kanë blerë 10 mln euro çokollata, por buxheti kundër kancerit nuk është 10 mln euro në këtë vend. Me një firmë të zv/kryeministres kanë vjedhur 50 mln euro, ndërsa fëmijët në shkolla dridhen nga i ftohti”, tha Lapaj.
Sipas Lapajt kryeministri Rama duhet të largohet edhe pse ka 83 deputetë në Parlament.
“A ja dha populli 83 mandate që ta vjedhë? Ato mandate kanë zero vlerë sepse populli e di të vërtetën që ata na vjedhin”, tha Lapaj.
Protesta ishte e qetë, po pati edhe momente tensioni me forcat e policisë.
Adriatik Lapaj dhe mbështetësit e tij po qëndrojnë prej 27 ditësh para kryeministrisë duke kërkuar dorëheqjen e Edi Ramës dhe krijimin e një qeverie teknike, dhe sot ata vendosën edhe një çadër para godinës së qeverisë.
