“Arrest me burg pa afat” është kjo masa e sigurisë që gjykata e Tiranës vendosi për efektivin Nevaldo Hajdaraj që vrau mëngjesin e të martës 25 vjeçarin Klodian Rasha.
Gjatë seancës efektivi i forcave “ Shqiponja” ka pranuar akuzat dhe ka shfaqur pendesë për ngjarjen.
Polici Nevaldo Hajdaraj
“Unë kam bërë një vrasje. Cilido qoftë vendimi juaj unë e pranoj. Jam penduar për aktin që ndërmora. Do doja shumë që në seancën e sotme të ishin edhe familjarët e të ndjerit në mënyrë që t’i kërkoja falje publikisht”
Gjyqtarja konfirmoi edhe kërkesën e policit për të patur në sallë familjarët e viktimës për t’iu kërkuar falje.
Para trupit gjykues Hajdaraj ka rrëfyer gjithçka ka ndodhur mëngjesin e tetë dhjetorit. Sipas tij ngjarja është zhvilluar brenda pesë minutave.
Ai tha se djali i ishte dukur i dyshimtë dhe për këtë kishte njoftuar edhe sallën operative për përforcime.
Më herët, policia kishte pretenduar se kishte vënë re një send të dyshimtë dhe ishte ndier i kërcënuar, ndaj dhe kishte përdorur armën.
Nevaldo Hajdaraj akuzohet për “ vrasje në kapërcim të kushteve të mbrojtjes së nevojshme” dhe kodi penal parashikon dënim deri në shtatë vite burg për këtë vepër penale.
