Një 39-vjeçar është arrestuar në Himarë, pasi po ndërtonte pa leje një objekt 5-katësh, njëri prej të cilëve nëntokë, ndërsa tre punonjës të Inspektoratit të Mbrojtjes së Territorit (IMT) të Bashkisë Himarë janë shpallur në kërkim për “Shpërdorim të detyrës”.
Policia e Himarës bëri të ditur se gjatë kontrolleve dhe verifikimeve në terren, në kuadër të masave për parandalimin dhe goditjen e paligjshmërive gjatë sezonit turistik, u konstatua një objekt në proces ndërtimi, në vendin e quajtur “Sugë”, i cili rezultoi se po ndërtohej pa leje.
Lexo edhe :
Related Posts
Në vijim të veprimeve procedurale, policia arrestoi në flagrancë pronarin e objektit, L. B., 39 vjeç, banues në Tiranë.
Ndërkohë, janë shpallur në kërkim D. H., 46 vjeç, M. K., 31 vjeç dhe A. H., 42 vjeç, me detyra përkatësisht kryeinspektor dhe inspektorë pranë Inspektoratit të Mbrojtjes së Territorit të Bashkisë Himarë.
Tre punonjësit e IMT-së dyshohen për veprën penale “Shpërdorimi i detyrës”.
Policia bën me dije se po punohet për kapjen e tyre, si dhe për dokumentimin dhe individualizimin e përgjegjësive penale të secilit prej tyre.
