Partia Demokratike denoncoi këtë të enjte e Partia Socialiste po përdor drejtorët e administratës për të bërë fushatë në emër të partisë dhe për të siguruar vota. Ish-deputeti Luan Baçi bëri publikë për mediat disa fakte. Ai nxori dy formularë të plotësuar nga njerëz që punojnë në administratë.
“Ata janë kërcënuar me largim nga puna, nëse nuk përmbushin detyrimin për të siguruar një numër të caktuar votuesish, që deklarohen pro Partisë Socialiste. Njëri formular është plotësuar në Drejtorinë e Shëndetit Publik në Fier, nën drejtimin e Mirela Mitros. Formulari tjetër i përket Bashkisë Fier me Kryetar Armando Subashin. Në të dy këta formularë janë shënuar emra nga punonjësi i administratës. Përbri emrit është numri personal i kartës së identitetit, numri i telefonit dhe njësia ku voton. Ka vetëm një arsye pse Edi Rama e ka ndërmarrë këtë operacion të paligjshëm, duke kryer një krim elektoral, qe dënohet nga Kodi Penal. Është humbja e thellë dhe largimi nga pushteti në 25 Prillin e ardhshëm. Edi Rama nuk u ka besën as socialistëve, sepse e di që ata e refuzojnë në masë këtë kryeministër të dështuar.”
Luan Baçi u shpreh i prerë se asnjë pazar nuk do të ndryshojë dot rezultatin e zgjedhjeve të 25 prillit. Ai shtoi se si për Armando Subashin, ashtu edhe për Mirela Mitron, do të ketë kallëzim penal.
