Presidenti i parlamentit iranian, Mohammad Bagher Ghalibaf, ka deklaruar sot se forcat e armatosura të vendit janë plotësisht të gatshme të reagojnë ndaj çdo veprimi që Teherani e konsideron agresiv.
Në një reagim të publikuar në rrjetin social X, Ghalibaf theksoi se “strategjitë dhe vendimet e gabuara sjellin gjithmonë rezultate të gabuara”, duke shtuar se “e gjithë bota tashmë e ka kuptuar këtë”. Sipas tij, Irani është i përgatitur për çdo skenar dhe “kundërshtarët do të befasohen”.
“Forcat tona të armatosura janë gati të japin përgjigjen e nevojshme ndaj çdo veprimi agresiv. Jemi të përgatitur për çdo eventualitet”, citohet në deklaratën e tij.
Nga ana tjetër, presidenti amerikan Donald Trump ka deklaruar se armëpushimi mes SHBA-së dhe Iranit ndodhet “në mbështetje mekanike”, duke nënkuptuar një situatë të brishtë dhe të rrezikuar për shembje.
Gjatë një daljeje për mediat në Shtëpinë e Bardhë, Trump u shpreh se dokumenti i fundit i dërguar nga Teherani ishte “i pavlerë”, duke shtuar se pas këtij zhvillimi armëpushimi është “jashtëzakonisht i dobët”.
I pyetur për çështjen e uraniumit të pasuruar iranian, Trump tha se fillimisht palët kishin rënë dakord për largimin e tij, por më pas, sipas tij, Irani ndryshoi qëndrim pasi marrëveshja nuk ishte formalizuar me shkrim.
“Duhet fleksibilitet në situata lufte. Ke shumë plane dhe duhet të përshtatesh çdo ditë,” u shpreh Trump, duke theksuar se administrata e tij ka një plan të mirë të përgatitur.
Në të njëjtën deklaratë, presidenti amerikan kritikoi edhe kurdët, duke thënë se ata nuk i kanë përmbushur pritshmëritë e SHBA-së, pasi “vetëm duan të marrin dhe jo të japin”.
