Partia Demokratike denoncoi këtë të martë një abuzim me pushtetin që sipas saj, po e bën Partia Socialiste. Zëdhënësja e PD, Ina Zhupa deklaroi kompania e nipit të deputetit socialist, Sadri Abazi, ka përfituar miliona euro nga tenderat e Autoritetit Rrugor Shqiptar. Sipas Zhupës, diçka e tillë është mundësuar falë kryeministrit Edi Rama dhe kryebashkiakut të Tiranës, Erion Veliaj.
“Kompania Alko Impex në pronësi të Abër Abazit, nipit të deputetit socialist Sadri Abazi, vijon të vjelë begatitë e tenderave nga bashkia e Tiranës dhe qeveria, konkretisht Autoriteti Rrugor Shqiptar. 4.8 milionë euro kontrata ka përfituar kjo kompani nga Autoriteti Rrugor Shqiptar vetëm këtë vit. Që kur Erion Veliaj erdhi në krye të Bashkisë së Tiranës, kompania e nipit të Sadri Abazit ka marrë nga kjo bashki tendera me vlerë 9.1 milionë euro, nga të cilat 6.2 milionë euro kontrata si operator i vetëm dhe 2.9 milionë euro në kontrata ku Alko Impex është operatori kryesor i konsorciumit.”
Denoncimi i përfaqësueses së PD vijoi më tej, duke akuzuar Veliajn se lejon nipin e Sadri Abazit që të parkojë lirshëm.
“Favoret dhe paratë publike që Erion Veliaj i dhuron bujarisht kompanisë së Arbër Abazit nuk mbarojnë këtu. Kompania Alko Impex shfrytëzon mijëra metra katrorë në ish-Parkun e Automjeteve Kombinat, Rr. e Fabrikës së Qelqit, ku parkon të gjitha automjetet dhe mjetet teknologjike. Një biznesi i duhet të paguajë 2 deri 3 milion lekë në vit për një vend parkimi në Tiranë. Pra, kompania e nipit të Sadri Abazit shmang në këtë mënyrë pagesën e dhjetëra apo qindra miliona lekëve çdo vit. Për çudi, parkingun e saj të paligjshëm nuk e shikon policia bashkiake e Tiranës, të cilës nuk i shpëtojnë as arkat me domate apo qeset me majdanoz që shiten për të fituar bukën e gojës. Siç e shihni, kjo kompani vjedh qytetin me aprovimin e heshtur të Bashkisë dhe institucioneve të zbatimit të ligjit.”
Ina Zhupa kërkoi nga kreu i qeverisë, Edi Rama që të veprojë njësoj si me kontratën DH Albania, edhe me kompaninë e nipit të deputetit socialist. Ajo kërkoi prishjen e kontratave.
