Aksident i trefishtë në aksin Elbasan–Peqin, pesë të lënduar
Një aksident rrugor është regjistruar rreth orës 19:20 në zonën e Murrasit, në Njësinë Administrative Papër, në aksin nacional Elbasan–Peqin, ku tre automjete janë përplasur me njëra-tjetrën.
Si pasojë e përplasjes kanë mbetur të plagosur pesë persona, të cilët kanë marrë dëmtime dhe janë transportuar me urgjencë drejt Spitalit Rajonal të Elbasanit për të marrë ndihmën e nevojshme mjekësore.
Deri në këto momente nuk janë bërë të ditura detaje zyrtare mbi gjendjen shëndetësore të të plagosurve.
Në vendngjarje kanë mbërritur shërbimet e Policisë Rrugore, grupi hetimor dhe ekipet e emergjencës, të cilat kanë ndërhyrë për normalizimin e qarkullimit dhe kanë nisur hetimet për zbardhjen e plotë të shkaqeve dhe rrethanave të aksidentit.
Për disa minuta, përplasja ka shkaktuar vështirësi në qarkullimin e automjeteve në këtë segment rrugor. Policia vijon punën për dokumentimin e plotë të ngjarjes dhe përcaktimin e përgjegjësive.
