Rreth 3 tonë domate janë shkatërruar plotësisht, duke sjellë një bilanc të rëndë dëmesh për fermerin Fatjon Asllani në zonën e Zharrëzës, në Patos. Ngricat e ditëve të para të vitit 2026 kanë goditur rëndë serat e tij, duke shkatërruar të gjithë prodhimin.
Prej 16 vitesh i angazhuar në kultivimin e perimeve në sera, Asllani tregon se asnjëherë më parë nuk ka përjetuar një dëm të tillë si pasojë e temperaturave nën zero.
“Kur erdha në sera në 1 janar, pashë gjithë prodhimin të shkatërruar. Gjithçka ishte ngrirë. Nuk kishte më asgjë për të shpëtuar.” thotë ai.
Pas këtij realiteti të hidhur, fermeri është detyruar të shkulë dhe hedhë të gjitha bimët, duke parë të shkojë dëm puna dhe investimi i një viti të tërë.
Asllani, i cili edhe më herët është përballur me pasoja të përmbytjeve, përllogarit se dëmi financiar kap vlerën mbi 2 milionë lekë të reja, një goditje e rëndë për ekonominë e familjes së tij.
“Kam pësuar dëme edhe nga përmbytjet, por kjo është goditja më e rëndë. Shpresa ime e vetme është dëmshpërblimi“, thotë ai.
Aktualisht, serat janë bosh, ndërsa fermeri pohon se nuk ka më mundësi financiare për të nisur një kulturë të re.
“Nëse nuk do të kem ndihmën e shtetit, jam i falimentuar. Nuk kam asnjë mundësi tjetër.” thotë fermeri.
Ngricat e fillimvitit kanë dëmtuar dhjetëra fermerë në zonën e Zharrëzës, por rasti i Fatjon Asllanit konsiderohet më i rëndi, pasi domatja ishte në kulmin e prodhimit dhe në periudhën me çmimin më të mirë në treg, duke e shumëfishuar humbjen ekonomike.
/vizionplus.tv
