Ish-kandidati për kreun e Partisë Demokratike, Fatbardh Kadilli, në emisionin “Quo Vadis”, teksa komentonte përjashtimin e Sali Berishës nga grupi parlamentar i PD-së pasi u shpall “non grata” nga SHBA, deklaroi se “elitës politike do t’i pritet koka”.
“Kemi të bëjme me një elitë politike që po dekapitohet, po i pritet koka. Ne dështuam si shoqëri që të luftonin korrupsionin. Në ‘98, filloi për herë të parë presioni, jo vetëm amerikan, por nga i gjithë partneriteti perëndimor, kontribuan për konferencën kombëtare kundër korrupsionit, e drejtonte Nano. U pa që dështoi. Filloi me procesin tjetër për të ngritur shoqërinë civile që t’i tregonte vendin korrupsionit. Edhe kjo dështoi. Nuk pati ndonjë sukses. 2005 është dështim, kur Berisha tha që ‘Fatos Nano është llumi i shoqërisë’, tentoi të na e bënte President, këtu mbarojë antikorrupsioni i Berishës.”
Sa i përket përplasjes mes ish-kryeministrit Berisha dhe kreut aktual të PD-së, Basha, Kadilli theksoi se të vetmit që nuk fitojnë nga kjo përplasje janë demokratët, e për këtë ndjen trishtim.
